SHARE

Madaxweynaha Soomaaliya Maxamed C/llaahi Farmaajo ayaa mar kale ugu baaqay Kooxda Al-Shabaab wada hadal ay la galaan dowladdiisa.

Madaxweyne Farmaajo ayaa Al-Shabaab u diray fariin ah in aysan Shacabka dilin, hantidoodana bur burin, taa bedelkeed ay dowladda Federaalka wada hadal la galaan.

“Waxaan u direynaa dib u heshiisiin oo aan ka hadleynay maalmahaan la soo dhaafay oo idil waa qolada dorraad carruurta nooga laayay maqaayad lagu afurayey oo aanu u aabo yeelin dumar, duqey, carruur iyo cirroole oo aan u dirnay cafis oo aan ku dhahnay kaalaya waan wada hadleynaa hubka dhiga , haddii aad la dagaaleysaa dowlad, dowladdaan shacabkaa keenay ee aan wada hadalno, dadkaan haleynina hantidaanna ha burburinna, welina waan ku taagannahay, ilaahay waxaan ka baryeeynaa qoladaasi inuu soo celiyo oo caqligooda ku shaqeeyaan oo ay ka haraan qolada la shaqeysa ee ajanabiga ah”ayuu yiri Madaxweynaha oo hadalkan ka sheegay shir dib u heshiisiin oo shalay lagu soo gaba gabeeyay magaalada Muqdisho, kaasoo ay soo qaban qaabisay Wasaaradda Arrimaha Gudaha iyo Federaalka.

Sidoo kale Madaxweynaha ayaa sheegay in xilligan aanay shacabka u baahneyn colaad joogta ah, balse ay u baahan yihiin nabad iyi barwaaqo.

Dowladda Federaalka ayaa dhowr jeer Al-Shabaab ugu baaqday miiska wada hadalka, hase ahaatee Al-Shabaab ayaa diiday oo shuruud uga dhigtay inta Ciidamo shisheeye dalka joogaan aan wax wada hadal la fureyn dowlad ay ku tilmaameen inay xukumaan shisheeyaha.